Dr.Eman Elabed
اهلا وسهلا زائرنا الكريم
كم يسعدنا ويشرفنا تواجدك معنا
أخ /ت عزيز /ه علينا نتعلم منكم
نستفيد ونفيد معا من خلال ابدعاتكم
نرتقي معا بكل معلومه صادقه ونافعه
في الدين والدنيا يسعدنا جدا مشاركتم معنا
تحت شعارنا الاحترام المتبادل وحق كل الاعضاء
في حريه التعبير دون المساس بمشاعر الاخرين
ومنتداكم لا يقبل بالخوض في السياسه او الاساءه
واحترام عقيده الاخر

Dr.Eman Elabed


بحـث
 
 

نتائج البحث
 


Rechercher بحث متقدم

ديسمبر 2017
الإثنينالثلاثاءالأربعاءالخميسالجمعةالسبتالأحد
    123
45678910
11121314151617
18192021222324
25262728293031

اليومية اليومية


الهكسوس.. من العَدَم وإلى العَدَم ذهبوا

استعرض الموضوع السابق استعرض الموضوع التالي اذهب الى الأسفل

الهكسوس.. من العَدَم وإلى العَدَم ذهبوا

مُساهمة من طرف محمد العابد في الخميس سبتمبر 21, 2017 4:52 am

الهكسوس.. من العَدَم وإلى العَدَم ذهبوا
يعتبر “الهكسوس” اول احتلال أجنبي لمصر في التاريخ، وأول ملوك لمصر من أصول غير مصرية، وكان في الفترة الزمنية بعد تدهور الدولة الوسطى وقبل عصر الدولة الحديثة، يعني في القرن السابع عشر قبل الميلاد وتحديدا في 1650 :1550 ق.م
بيختلف المؤرخين حول أصل الهكسوس، او البلد اللي نشأوا فيها، فيهم اللي بيقول انهم ساميون من منطقة ميزوبوتاميا (العراق القديمة) وبيستشهد ببعض اسماء لهم ومعبودات كالاله “بعل” وغيرهم اللي انتشرت في منطقة ميزوبوتاميا القديمة، ومنهم اللي قال انهم من بدو الجزيرة العربية وبيعتمد على التسمية الفرعونية الهكسوس واللي معناها الملوك الرعاة، ومنهم اللي قال انهم من اواسط اسيا.. ومنهم اللي بيقول انهم خليط من شعوب عديدة!.. والواقع ان مافيش حفريات او اثار في اماكن اخرى غير مصر تدلنا على منشأ الناس دي  أو تتكلم عنهم بصورة أكيدة، وايا كانوا فهم دخلوا مصر في فترة ضعف من حكامها ومن جيشها، فاستطاعوا تأسيس دولة والأستقرار فيها لكن لم تكن على كامل أرض مصر. فهم سيطروا على الدلتا ومصر الوسطى، ونقلوا العاصمة الى (أواريس) بدلا من (منف) وظل الصعيد والنوبة (مصر العليا) مستقل يتمتع بحكم ذاتي وان كانوا ملوكه من الضعف انهم يحاربوا الهكسوس الغزاة ويرجعوا لمصر وحدتها واستقلالها..


قول المؤرخ مانيتون ان الهكسوس هاجموا مصر من جهة الشرق بأعداد ضخمة جدا، اجتاحت الدلتا في ايام معدودة، وانهم ارتكبوا العديد من المذابح لأرهاب الشعب!.. دمروا العديد من المعابد وقاموا بحرق العديد من البيوت حتى تم استسلام الناس، وبعد كدا نقلوا العاصمة لمدينة في شرق الدلتا أسموها (زوان) واللي بقت بعد كدا مدينة اواريس.


وبتدلنا النقوش والأثار المكتشفة من العهد دا انهم بعد فترة بدأوا يتخذوا الشكل الفرعوني أمام العامة (الناس) كنوع من اخضاعهم للحكم (زي ماعمل قمبيز والأسكندر) واتخذوا كمان الأله المصري “ست” معبودا لهم الى جانب ألهتم بعل وغيره.. كما اتخذوا خواتم منقوش عليها باللغة الهيروغليفية الفرعونية، وإن كانت النقوش بتدل على انهم تصوروا بأشكال مختلفة عن المصريين من حيث البشرة البيضاء (مش السمراء) وكان لهم لحية مستمرة لشعر الرأس (دقن يعني) بعكس المصري القديم اللي كان بيلبس احيانا لحية مستعارة. كمان اتخذوا اشكال مصرية في التصاوير وطريقة الحياة اليومية. وإن كانوا اثروا في الحياة المصرية بادخال تكنولوجيا خاصة حربية مش معروفة في الوقت دا وهيا استخدام العجلات الحربية اللي يجرها الخيل، واللي ماكانتش معروفة في مصر في الوقت دا، وسفن الحرب المصنوعة من اخشاب الشجر (لاسيما شجر الأرز) ودا ماكانش معروف في مصر اللي كانت بتصنع المراكب، حتى الكبيرة، من الحلفا والبوص، كمان استخدموا سيوف معقوفة (ملوية) مش مستقيمة واللي كان بيستخدمها أهل مصر ومصنوعة من الفولاذ بحيث ان السيف يبقا قوي وماينكسرش من المبارزة، وكمان استخدموا تكتيكات جديدة في الحرب على المصريين




في عصر الملك (سقنن رع) من ملوك مصر العليا المستقلة عن حكم الهكسوس بدأ ملك الهكسوس “أبوبي” انه يلاحظ تنامي قوة الجيش فخاف انه يفكر في محاربته فقرر انه هوا اللي يبدأ بالهجوم، وبيحكي المؤرخ مانيتون عن افتعاله سبب للخلاف انه ارسل رسالة للملك سقنن رع بيطلب فيها قتل افراس النهر الموجودة في مدينة طيبة (وفرس النهر كان حيوان مقدس عند المصريين) لأن صوتها بيزعجه في أواريس بشرق الدلتا (!!).. فاستغرب الملك سقنن رع من طلبه واعتبرها اهانة وخرج لمواجهة ملك الهكسوس في معركة بشمال مصر العليا اسطاع انه يحقق فيها بعض النجاحات ضد جيش الهكسوس لكن مش نجاحات كاملة وكلفت الملك سقنن رع حياته، فقُتل في المعركة وتم تحنيطه على حالته اللي كان عليها مصاب بضربة في الرأس




بعد سقنن رع تولى ابنه الكبير الملك كامس واللي كان بيعتبر اخر ملوك الأسرة ال17 وكانت فترة حكمة مدة بسيطة جدا لا تتعدى 5 سنوات الا انه عمل انجازات كتيرة جدا، تابع فيها ما بدأه والده من حرب الهكسوس وشن هجوم كبير عليهم بجيش بري كبير واسطول مراكب في النيل، واستطاع انه يقترب من العاصمة اواريس، وبتحدثنا بعض النصوص عن ان الملك كاموس عامل المصريين المهادنين للهكسوس واللي قبلوا يعيشوا تحت حكمهم معاملة قاسية، وانه حصل على مكاسب كبيرة من جيش الهكسوس منها 300 سفينة مصنوعة من خشب الأزر اللي كان بيستوردوه الهكسوس من فينيقيا (ساحل الشام) والسفن دي كانت محملة بأسلحة ودهب وفضة ومؤن للجيش. وعلشان يوقف ملك الهكسوس تقدم الملك المصري فقام بالأتصال بملك النوبة وطلب منه مهاجمة جنوب مصر، فلما وصلت الأنباء للملك كاموس ارسل حملة للجنوب لتأديب ملك النوبة، وهناك بعض النصوص تذكر اسم الملك كاموس واخيه أحمس عند الشلال الثاني في بلاد النوبة بتسجل انتصاره عليهم.


وبعد مقتل الملك كاموس لأسباب غير معروفة، كانت الملكة اياح حتب لها ولد أخر غير كاموس أسمه أحمس (أه-موسس ومعناها “إبن أه” أو “ياه” وهو أله القمر عند قدماء المصريين). وكان عمرة 13 سنة، فأرسلت به ليتعلم القتال والفروسية مع المحاربين القدماء، ولما بقا عنده 19 عام (طبقا لاقوال المؤرخ مانيتون) ارسلت له أمه مع احد رجاله رسالة عثر عليها اخيه الملك كاموس في حربه مع النوبيين، من ملك الهكسوس بيطلب فيها من النوبيين الزحف على طيبة وتدميرها، فاستشاط الملك غضبا وقرر محاربة الهكسوس للنهاية!.. وسار بقوات كبيرة واجهت الهكسوس في عدة معارك ادت الى القضاء عليهم تماما في دلتا مصر، وقام بتدمير العاصمة اواريس ومطاردة فلول الهكسوس حتى صحراء سيناء..




ومن بعدها خرج الهكسوس من تاريخ مصر نهائيا، ولم تعد لهم قائمة مرة تانية.. كمان لم يتم العثور على اي اثر لهم أو اشارة في اي حضارة من الحضارات الأخرى المحيطة بمصر!.. وبدأ في مصر عصر جديد من التقدم والأزدهار والتوسع في رقعة الأرض، وهو عصر الدولة الحديثة والأسرة 18 واللي بتضم ملوك عظام سابوا بصمة كبيرة في التاريخ المصري القديم وكان اول مؤسسها هو الملك أحمس.. قاهر الهكسوس.


جدير بالذكر ان من بعد خروج الهكسوس بدأ ملوك مصر يشعروا ان الشعوب المحيطة بتطمع في تملك ارض مصر فبدأوا يوسعوا رقعة الأرض للخارج عشان يبقا فيه بعد استراتيجي بينهم وبين اقرب عدو بالنسبة لهم، ودا اللي خلا فراعنة الأسرة 18 يخرجوا خارج حدود مصر ويضموا ليها املاك دول عديدة من الجوار زي النوبة وفينيقيا وارض كنعان وساحل ليبيا وشمال السودان.
مصادر

  • معالم تاريخ وحضارة مصر الفرعونية – سيد توفيق.
  • موسوعة مصر القديمة ج4 – سليم حسن .
  • ويكيبيديا الموسوعة الحرة.


_________________
[ندعوك للتسجيل في المنتدى أو التعريف بنفسك لمعاينة هذا الرابط]
 
avatar
محمد العابد
Admin
Admin

المهنـــــــــــه :
المزاج :
S M S :
التعارف : آحلي منتدي
الجنسيه : مصر
الجنس : ذكر
عدد المساهمات : 1005
تاريخ التسجيل : 19/09/2016
الموقع : http://sanko.alhamuntada.com/forum

معاينة صفحة البيانات الشخصي للعضو http://sanko.alhamuntada.com/forum

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى